الجمعة، 6 سبتمبر 2013

#العراق فشل #SWBaghdad

#SWBAGHDAD


تكلمت قبل بدء الحدث عن الحدث نفسهُ في هذا المقال :


و كنت اتمنى ان يكون الحدث ناجح و من كل قلبي و سمعت من احد المنظمين يتكلم عن نجاح الحدث و خروج 3 شركات ناشئة من هذا الحدث العظيم ,
 حيث خرج احد منظمين الحدث (علي محمد اسماعيل) على قناة السومرية في برنامج شباب و بنات العراق و قال خرج من حدث #SWBAGHDAD ,
ثلاث شركات ناشئة و الان هذه الشركات تتطور الصراحة كنت فرحان و مبهور.

لكن مع كل الاسف يوم أمس قلت مع نفسي خلي نشوف الفائزين بالمركز الاول فذهب الى مجموعة فكرة سبيس و سئلت عن الفائز الاول و العمل فقالوا لي تحدث مع الانسة مريم قلت الله يقدم فيه الخير, و ذهب و ارسلت لها رسالة و اعطتني الفيديو (أي العمل) , و فعلا كنت متحمس حتى قلت لها رايح اجيب ببسي و كيك -_- لأن الصراحة انا سمعت ان العمل هو انميشن (Animation) يعني رسوم متحركة او حتى فيلم ثلاثي الابعاد قصير لأن هذا هو ملعبي فكنت متحمس لدرجة لا تصدق.

فتحت الفيديو و اذا بهذا الفيديو شاهدو الفيديو يا جماعة الخير :


هذا هو العمل الذي فاز بالمركز الاول !! الذي هو بعنوان (هاي شبيكم) و هما اسمو بالعمل الانتاجي ! خلي نكمل حجينا رحمة لله .

سوف اتكلم عن هذا الهراء الي بالفيديو بعدة نقاط :

1- العمل منسوب لكلمة انيميشن (Animation) و هو مالة علاقة بهذه الكلمة بتاتا
2- العمل يشجع على الكسل و الهجرة من البلد واحد يكلك شكو باقي و الثاني ايكلك انام و الثالثة اتكلك ميكاب
3- العمل مالة علاقة لا بالتقنية و لا بالكومبيوتر و لا الانترنت اصلا و لا هو مشروع اصلا 
4- العمل كأنتاج هذا هراء هي جايبة الفيدوات من يوتيوب و من كيك و مصورتلها كم فيديو و مكيفة مسوية انتاج
5- الرسم مال وحدة بكد بت خالتي بعدها بالروضة 
6- الصوت يروح و يجي و خرخشة عبالك كاعدين بالعلاوي 

هذه النقاط الفوك غير كافية لتهزئة العمل صراح العمل بائس و ضائع و كل واحد يكول عليه عمل متقن و انتاج فني و كوميدي هذا غبي و لا يفهم بشي اصلا. 

انا كوني مصمم و محرك ثلاثي الابعاد كنت اسئلها عن البرامج المستخدمة بالعمل و متحمس كلت اكيد هاي فدشي لأن فازت و مكيف كلت راح نساعد او شي من هذا القبيل تالي متالي يمكن مستخدمتلي برنامج الرسام مال الوندوز.

و انا شخصيا اريد اعرف الحكام على يا اساس حكموا شنية النقاط الي اخذوها بنظر الاعتبار على التحكيم على المشاريع !

ذهبت لحد الاشخاص الذين كانوا بالحدث فسأتهُ قلتلة انت راضي عن هذا الخريط جان يكلي لا هي جان تقديمها للفكرة حلو و ناجح , هل هذا كلام ! الحدث ليس لهُ علاقة لا بالطرح و لا بالتقديم الموضوع مختلف اصلا , بس كلولي لواكة مال الشعب العراقي و التلطلط اني اكلك اي صحيح ( اصقد الحكام ) , اذا هذا العمل الاول لعد الاعمال الاخرى شنو ؟ .

و مكيفين مسويلي الحدث بفندق اخر موديل و صارفين و مصخمين متكلولي شلون نواجه العالم نواجه العالم بهيج عمل ولكم و الله عيب كافي عاد مو دمرتوا للبلد :@.

خلي يجيني احد الحكام او المنظمين ممكن نتناقش بالموضوع ممكن هناك خطأ هناك مشكلة يجوز نلكي حل لهذا الهراء يا اخوان العمل لا يليق بالعراق و لا بالعراقين و مستحيل يحصل على المركز الاول , لا تقولوا خسر و ديحجي هيج اني اصلا ما كنت موجود بالحدث.

مع الاسف هذا الكلام و هذهِ الاعمال تجيب المرض و الكأبة و البئس للشاب العراقي مع الاسف هكذا اشخاص يمثلون بغداد و مع الاسف عليهم ان يفتخروا بأنفسهم بهذا الهراء و مع الاسف يضحكون على العالم و يكولون الحدث ناجح و طلعنة شركات. صدك طيح الله حظج امريكا.

بعد هذا الكلام احب اكول للمنظمين و للحكام انتم علم ينرفع بهذا البلد رمز للفشل و البأس و اليأس و رمز لللواكة و التلطلط العراقي.

و مراح اكول اسف اذا اجاوزت على واحد لأن من حرقت قلبي على هذا البلد الذي على أيديكم راح ينبني.

و تحياتي Omer Mustafa



18 التعليقات:

  1. احترم رأيك واحترم مقالتك بس ليش دا احس من وراها كسب شهرة لا اكثر على حساب ناس .. ما ادري بس مبين من طريقة كتابتك انت محاضر الحدث لو كنت حاضرة جان فهمت بشكل اكبـر اولا ...انت ماخذ الفكرة كلهة من ناحية التقنية بشكل جبير الفكرة الي تفوز يكون الهة ابعاد معينة تساعدهة على الفوز وكانت ابعاد هاي الفكرة هيه تأسيس شركة تعتمد على هذا المجال لكن مع الاسف ما لكت الاخت المهتمين بشكل جبير لفكرته فة اضطرت الى عملها بشكل يدوي لكن كان للفكرة مميزات بشكل اكبر من نواحي معينة اهلتهة للفوز ثانيا انت ليش تشوف مشروع واحد مة تشوف المشاريع البقيـة كلهة عموما هذا رأيك مع الاسـف ما بي اي احترام والمنضمين حسب ما شفتهم كانو متعاونين كولش وحمد لله والحكام ايضا بس عذرا انت كاتب مقالة لهدف الشهرة لا اكثر وبحجة محروك گلبك ما ادري شون بس علمود تاخذ رضى المقابل ولو تريد تنتقد شي جان انتقدته بسألوب راقي بس مع الاسـف ماكو اي اسلوب مع احترامي الك

    ردحذف
    الردود
    1. اتريد اطيك الروابط مال ستارت اب ويكند مال اسيوط الي هما بصعيد مصر ؟ و تقارن بين صعيد مصر و بغداد عاصمة الثقافة العربية ؟ عود من تعرف انت وامثالك شنو ستارت اب ويكندوريادةاعمالذاك الوكت تعال كلي دا اكتب مثال لشهرة, و الشهرة مو كلش بالحياة و تحياتي الك :), و بالمناسبة اذا لكت الناس ممهتمين لفكرتها شكو دسويها اصلا !

      حذف
    2. ولحد الان اسألك انت جيت للحدث وشفته شخصيا .... متأكد اني ١٠٠ ٪ لا هيه بس مجرد اشياء دة تكولهة بالوهم ثانيا ليش هيج منزعج بطريقة حجيك "انت وامثالك" ما عندي شي وياك شخصي وبالنسبة للشهرة اكيد موكلشي بالحياة بس راح تاخذ منهة فلوس :) وبالنسبة الهة هيه حرة تسويها او لا واتوقع اني شرحتلك السبب شنو جان

      حذف
    3. ادري يعني الحدث صار بس علمود نجمع ونضحك ونتونس وبعدين نطلع مشروع مادري شوصفلك اياه بس تعال اني وانت او اني ابحدي نفتح برنامج paint ونرسم ونلون راح نطلع نتيجة احسن من الي بالفديو ؟ بربك هو هذا الستارت اب ويكند ؟

      خويي بما انو انت حضرت الحدث وجان هدفكم حسب ما يظهرلي انو تخرجون بمشروع يفيد البلد ويستحق ان ياخذ الحدث عوفوا المجاملات على صفحة لاتنطون اعذار من جوه الكاع وتكولون العراق ظروفه تعيسه وملكت فريق يشجع الفكرة هاي الامور كله لو انتو عدكم خبره ومحترفين وصدك تريدون تسوون شي لهذا البلد جان انطيتوا الفوز لغيره مو علمود جائزة او فلوس على الاقل ادعموا معنويا لان مو كل الناس تعبانين مثل صاحبة الفديو اكو ناس من صدك محترفين ودور باليوتيوب راح تلكه شباب يشتغلون بجهودهم

      وماحجيلك على الي خارج العراق وان شاء الله هما الي يحسنون الصورة الي انتو يوميه تشوهوه

      حذف
    4. اول شي اني مو من فريق الـي سوة الانيميشن ... ثانيا والحمد لله المشروع الي طلعنه بي اني وفريقي حمد لله كان متميز واتوقع حسن صورة جبيرة للعراق .. وهذا الشي الي نريدة .. واذا تحب تقرة هاي المقالة الي كتبت عن ستاربت ويك اند بغداد من GeekWire مدونة غنية عن التعريف واتوقع مو اي شي ينشر بيهة
      http://www.geekwire.com/2013/startup-weekend-baghdad-othmane-rahmouni/
      هاي برأيك محسنت صورة ولو بجزء بسيط .. انت الي تعرفة معلومات خاطئة مصدرها بالاصـل مبني على وهم حقك تحكم علية هيج شي ثانيا شوف المشاريع البقية شوف شكم فريق صار ليش مركز على نقطة وحدة انيميشن صح الفديو طلعو بي ضعيف .. بس الفكرة بالاصل كانت لبناء شركة تعليمية يكون بيهة هيج نوع من المحتوى ثانيا انت كمحترف ليش مة انضميت وحاولت تساعد غيرك ااذا انت تريد تحسن هذا البلد لا تحجي سوي شي على الاقل لأن حجي سهل ينكال .. سهل انو تنتقد وتكول هذا شي مو زين ومن حقك بس خلي يكون على نطاقك معقول يعني اذا انت تكول هذا الشي فاشل انت جربت تسوي شي احسن منه .. حتى تحجي عليه بهل طريقة لا .. فه عموما اتمنى ان يكون النقد وفق شي مبني على يقين + يكون منطقي اكثر .. الحدث مو صاير علمود ينطي جائزة بل الحدث صاير علمود ينطي خبرة اكثر للمنضمين وحمد لله من وجهة نضري الكل استفادت من عدة نواحي سواء كانت تقنية او معنوية لأن اجوي هواية مدربين وانطو نصائح صراحة غنية .. واني مدا احجيلك دفاعا عن الحدث ولا اني محامي بس هذا الحق وشكرا الك

      حذف
    5. اني اساسا خارج العراق فما عندي اي عداوه ويه المنظمين او الي شاركوا ولا اني جنت منافس حتى اركز بالسلبيات بس اني دائما اتابع ريادة الاعمال وعندي اطلاع على الاحداث بمصر لان اني عايش بيه واتابع المشاريع الي تخرج من هاي الاحداث بس من اشوف ستارت اب ويكند بغداد طالع منه فديو حتى ماكدر اكول انيميشن عليه لان هذا ماله اي دخل بالانيميشن

      واتمنى انو تطرح موضوع او نبذة او اي مصدر نتابع بي مشروعك على الاقل تغطي على هذا الي صار

      اما من ناحية اني جربت اسوي شي وطلع احسن ؟
      حاليا اني بمرحلة تأسيس شركة تطوير تطبيقات ويب وموبايل

      حذف
    6. كولش حلو اني ما ردت انشر اي شي لأن صاحب المدونة احتمال مة يتقبل هذا الشي بس اني من فريق Mahaw اذا تحب تشوفهة وحاليا احنة نسوي تطبيقات للموبايل وللويب مو دعاية او شي بس هذا تلبية لطلبك وحمد لله ستارت اب ويك اند اخذت منة خبرة شخصيا اكدر اكول فادتني كمطور ويب والايوس وغيرهة من الفرق البقية اذا تريد تشوفهة مثل Snap مشروع صراحة جميل كولش اتمنى تشوفة ومشروع Baghdad Life ومشروع اخر نسيت اسمة بالضبط كان ايضا طلعو بـ Product حلو بمجال انضمة الحماية عن بعد والكل كان تقبلهة للموضوع بشكل جميـل و بالنسبة لمشروع الانيميشن اتمنى تركز بفكرة المشروع اول المنتج صح ضعيف بس الفكرة الاساسية هدفهة جميل واعيد واكرر الكل استفادت محد خسـر شي واتمنى الك التوفيق ولشركتك واتمنى انو الكل تتفهم الموضوع من منضور اوسع لأن ستارت اب ويكند يغداد مو بس بي فكرة الانيميشن اكو غير افكار لخة تستقحق انو الواحد يفتخر بيهة ويكول هاي افكار عراقية ومحد يشوه سمعة غير هاي التدوينات الي اعيد واكرر مبنية على اساس وهمي

      حذف
    7. اني دا اكولك انيميشن للدلالة فة اتمنى تتفهم هذا شي

      حذف
    8. بالعكس اخي العزيز انت فاهمني غلط ياريت لو تخلي اثمار الحدث هنا حتى نشوف هل صحيح الحدث اثمر لو بس خريط مثل المركز الاول و شكرا

      حذف
    9. و لو رأينا هناك مشاريع ناجحة اكيد راح نتكلم عنها بشكل طيب ان شاء الله :)

      حذف
    10. اشكرك واتمنى منك هذا الشي صراحة
      https://www.facebook.com/Snap.Food.iq
      https://www.facebook.com/BaghdadLifetheOtherFace
      https://www.facebook.com/themahaw

      تكدر تشوفهم واكو بعد بس مع الاسـف ما اعرف اوصل الهة واتمنى تعيد النضر بهاي المسالة

      حذف
  2. فقط كم كلمه.. مستوى العمل الفائز يحدد مستوى الحدث. ;)

    ردحذف
    الردود
    1. سلمت اناملك :) هذا هو الكلام المضبوط

      حذف
  3. والله صدك فشل بفشل شفت الفيديو واي واحد ماله علاقة لا بلحاسبات ولا بلتقنية يكدر يسوي بس هي لواكة لا اكثر ولا اقل بس اريد اعرف شنو الشروط التي استند عليها الحكام والفيديو اخذ المركز الاول بيها صدك ميصير براستة حظ من جان بوكتة وحجيتلي عنة كلت فد شي راح يصير وراح وين ماكو واحد مطور محترف ومهندسين راح يشتركون بي ومن جنة نحجي علية واحنا رايحن للصناعة لسة اذكر جنة على جسر السنك وحتى ثبرناها للكية ونزلنه صدك الله يطيح حظج امريكا الي خلت كل سايب يصير حكم ويصير مطور فاشل ب عراق الواسطات وعراق التخلف والجهل ويفوزون ناس متستحق مثل من كول بالعراقي شغل من جوة العباية اوف يا ربي لتضوج عموري الله كريم

    ردحذف
  4. عزيزي اخالفك بكلمة فشل .. الحدث نمى الكثير من طريقة التفكير والعمل للشباب المشاركين .. و الشباب المنظمين ادو افضل ما يمكن وكان حدث رائع حسب مشاركتي فيه ..
    لكن المشكلة تكمن في بعض الحكام وفي العمل الفائز .. بعض الحكام برغم من مركزهم الراقي الا انه اتضح انهم يحبون شي يضحكهم وخلص
    العمل الفائز مع احترامنا لمقدمته لكن لا يرتقي ابدا لمثل هذا الحدث
    وكان عليه حتى استغراب واعتراض من بعض الشباب المنظمين ..

    ردحذف
  5. اكيد اخي احترم رأيك و اتمنى ان ترينا بعض المشاريع التي تكون تخفف نظرتنا عن الحدث و شكرا لتفاعلك

    ردحذف
  6. مع الاسف فكرة نظام الزوجي والفردي لم تكن ضمن افكار الفديو الفائز "هاي شبيكم" لحل ازمة الاختناقات المرورية في بغداد
    ولو كانت موجود كان اعتقدنا ان الحكومة تبنت مشروع هذه الشركة الناشئة في قرارها الجديد لسيارات الزوجي والفردي!
    * اكو الآف الفديوات العراقية الرائعة والافكار الابداعية التي لم تحتاج الى مؤتمر وفندق وعرب واجانب وبهرجة اعلامية وشهور من التحضير.

    ردحذف
    الردود
    1. هههههه يا اخي بردت قلبي الله يبرد قلبك ^_^

      حذف